মার্ বদিয়ালম (চট্টগ্রামী ভাষার গল্প)

মার্ বদিয়ালম
কাফি কামাল

ক.
আঁফেনামারর বাদে বউতন খেলা অইলেঅ গোল গরিত নপারি দুনঅ পাঁটির মাথা হারাপ অইগেইঅগই। বঅল খেলা বাদ্দি দুনো পাঁটির ফিলিয়ার অক্কলে ঠ্যাংবারি মারামারি শুরু গইরগ্যে। রেফারিএ অলইদ কাড দেহাই কুল নঁপায় পাআন অবস্তা। দুনো পক্কর দশশক অলেঅ মা-বইন তুলি গালাঁলি শুরু গরি দিয়ে। য়েন সঁত অটাতগরি বে¹ুনরে ম্যাচিকহাণ্ড দেয়াইয়ে পাআন গরি লালদলর চাইজ্জনরে হাড়াইয়েরে সবুজদলর বদিয়ালম বঁললই লালদলর পেলান্টি বক্সর ভিতর ঢুকি যাগই। এহন গুলিত্তুন ছুড়াইত পেল্লেই গোল অইজারগই। য়েন সঁত মাড়র দইনপারত্তুন হঅন এজ্জন্যে ডাক মারে- র্মা বদিয়ালম। মুঁঅত্তর ভিতর ভাইরাসন্নান বেয়া¹ুনে ডাক মারে- র্মা বদিয়ালম। ইয়ারমদ্দে বদিয়ালম চম্মুক পাতাঁইরগ্যা বলত লাতি মারে। বদিয়ালম কিছু বুঝি ওড়নঁর আগে চাইরমিক্কাত্তুন আবাজ ওড়ে- গো ও ল...।
অটাতগরি গোলহাই বেচওত অইযাগই লালদলর পিলিয়ার অক্কল। রেফারীঅ ফুওত গরি বাঁশি বাজায় দে। সবুজ দলের পিলিয়ার অক্কলে ততনে বদিয়ালমরে হাদত তুলি নাচানাচি শুরু গরি দিয়ে। ওইক্ক্যা মুঅত্তর ভিতর টাডাল পরইগ্যা হাজুর গাছর নান আমাত দর্শকঅক্কলও অই চই শুরু গরে। কিন্তু গোল অনঅর পর লালদলর পিলিয়ার অক্কলে ওগ্যারপর ওগ্যা ঠেংবারি মারে বদিয়ালমরে। তিন-চাইরবার ঠেংবারি হেই বদিয়ালম ল্যাংগাইতে ল্যাংগাইতে মাড়ত্তুন বাইরই যাই। তার বদইল্যা আরজ্জন নামে। বদিয়ালম যহন মাড়ত্তুন বাইরর তহন মাড়র চাইরমিক্কাত্তুন আবাজ ওড়ে- র্মা বদিয়ালম, র্মা বদিয়ালম। এজ্জনর মুখত্তুন অন্যজনে হারি লইতে লইতে এহন বেয়া¹ুনর মুখত এক্কান হতা- মার বদিয়ালম। চারপাআলদি মাইনস্যর মুখত নিজর নাম ওনি বদিয়ালমর বুক্কান ফুলি ওড়ে।
য়্যাদিনর গোলইবা দঅনর পর এড্ডইল্যামিক্কা হিরো অইগেইঅই বদিয়ালম। রাস্তা ঘাড়ে আর দোয়ানে পারিএ তারে দেইলে এহন মাইনস্যে হাতিল তোয়াজ গরে। চারমিক্কা তান্নাম ছড়াই গেইঅই। মাইনসে কিঅল্লাই মার বদিয়ালম হতা শুরু অইয়ে য়্যাই হতা নজানে। ইয়ান জাননঅর দরহারঅ মনে ন গরে। এজ্জনর মুখত্তুন আরেজ্জন গরি বেয়া¹ুনে হতাইয়ান মুখল্লই ফেলাইয়ে। ভালা-মন্দ যেহনঅ হতাত এহন হতায় হতায় বেয়া¹ুনর মুখত্তুন ফট গরি বাইরঅই যাগই- মার বদিয়ালম। পইল্যা পইল্যা মাইনস্যর মুখত নিজর নামওনি খু¹ম লাইগ-দ। আস্তে আস্তে এড্ডইল্যা মিক্কা গাইলর মত লা শুরু গরইগ্যে। বদিয়ালম যেড়ে যায় এড়েই হতা ইবা ওনে। হন গুরুত্বপুন্ন বৈড়খত বইলে এডেঅ কেয়াই না কেয়াই হই ওড়ে মার বদিয়ালম। দোয়ানে পারিয়ে বই এক্কাপ চা হাইবার জও নেই। বাজারত আড়িবার জও নেই। মাইনস্যে কি এক্কান যে মজা পাইল ইয়ান বদিয়ালম বুঝিত ন পারে।
এদিন্না মছইদদ গেইয়া শুক্কুর বাইরগ্যা জুমার নোয়াজ পরিবাল্লাই। ইমাম সাআবর হোতবার মাজঅদি পারাইল্যা সদ্দার অঅলে মছইদল্লাই ট্যায়া-পইসা তোলা শুরু গইরগ্যে। এক্কান আঁজি নোমালঅরে দুইজনে চাইরহোনাদি ধরে মুছল্লির হাতারে হাতারে আড়ি আড়ি টেয়া তোলা শুরু গত্যেই ইমাম সাবে হোতবার জোর হমাই দে। যেএন হোতবা শেষ অইতে অইতে পুরা মছইদর টেয়া তোলা অয়। সদ্দার জইরদ্দিন ও আইলামদ হাতার ঘুরি বদিয়ালমর চাম্মদি আই থিয়াআই। বদিয়ালম এক্কান দুইটাইক্কা নোড় ফেলাঅনর পোয়ারে পোয়ারে চদ্দার অক্কলে মারহাবাজগাত হঁই ওড়ে মারবদিয়ালম। ফোয়ারে ফোয়ারে আরঅ হয়েজ্জনে হই ওড়ে মারবদিয়ালম। শরমে বদিয়ালমঅর গদ্দেনাআন কাড়ি পরিযাইতঅ চায়। কেয়ারে কিছু হঅইতঅ নপারে, সইত ন পারে। তই বদিয়ালম এম্মিক্কাঅই থায়। বঅল খেলার মারবদিয়ালম যে আল্লা-রসুলর নামন্নান মাইনস্যে হতায় হতায় ঠোঁটর আগাত তুলি রাইব ইয়ান বদিয়ালমে বুঝিত ন পারে। পইল্যা হদিন গমল্লাই লও এখন গাইলর ডইল্যা লাগে।
হদিন আগে বদিয়ালম চিরিঙ্গাত্তুন ঘরত আইবস্বত্যি আরেক্কান ঘটনা দেই নিজেঅ আঁসি ওড়ে। বুইরগ্যা ও¹্যা বাইন্নাচরাত্তুন গাড়িত ওড়ি ভারা দিবস্যত পাচটেয়া হম দিতঅ চায়। গারির হন্ডাকটারে হনঅ ডইল্যা বুরইগ্যারে বুঝাইত নপারে। বুইরগ্যার একহথা, বেশি কিল্লাই দিঅম? হন্ডাকটারে হয়- ওবা আই তোয়ারে ডাইরে¹ারিত গরি লইজাইর ভারা কিল্লাম হম দিবা? বুইরগ্যা মুখর হতা হারি লই হঅয়- তোর গারি থিয়াই থিয়াই যাইতে যাইতে মাইনস্যর দিন খাইফেলার। চিরিঙ্গাত্তুন বাইন্যাচ্ছরা আইতে দুইঘন্টা ফেলাইয়ে। হন্ডাকদারও নাচোর বন্দা। ফোয়ারে ফোয়ারে জোয়াব দে- দুইঘন্টা আঁর গারির ছিট দহল গরি রাইখ্য আরঅ দুইঘন্টা লাইব। ঘন্টা ইসাব ছিটভারা দিলে আরও বেশি টেয়া দেয়া পরিব। এ্যাঁন গইত্যে গইত্যে অটাৎ এজ্জনে বুইগ্যার পলই হন্ডাকদারঅরে ধমকায় ওড়ে। এই বেড়া জুয়ুন দিয়ে ও্যঁওুন ল। আরেজ্জনে ডাক মারে- মারবদিয়াল। মুঅত্তর ভিতর জোয়ান হয়েজ্জন পাসিন্দার হন্ডাকদারলই আতিআতি শুরু দে। এতক্কন ধরি ইঁতারার হান্ড হারহানা দেহি বদিয়ালম চুম্মারি মনে মনে আঁসে।
ইয়ার তিন সপ্তা বাদে অজ ভিসা লই সদিয়ারব যাগই বদিয়ালম। কিন্তু তে সদিয়ারব গেইলে কি অইব, র্মা বদিয়ালম ভাইরাসঅ মুখে মুখে দেশ-দুনিয়া বেয়া¹ুয়া ছাইর অইযাই। এ এক হতা লই হতমিক্কা হত মানুষ বেইজ্জত অয় তার হনঅ ইসাব-নিয়াশ নাই। হত্তুন উৎপন্ন অই হড়ে যার, হারে শরমিন্দা গরের... এক আজব হারবার।

খ.
জোরপইরগ্যা ইউনিয়নের ছবারর নির্বাচিত চেয়ারমেন বদিয়ালম চৌধুরী। যুদ্ধর পরততুন অইতে প্রত্যবার বদিয়ালম চৌধুরীকে কেয়াই আরাইত ন পারে। তেই গরেদে শেক মুজিবর পাআটি-আমামিলীগ। কিন্তু এলাকার বেয়াক মাইনস্যে তেইরে খুব পছন্দ গরে। গোস্বাঅলা বদিয়ালম চেয়ারমেন কেয়ার ইক্কা চোখ লাল গরি চাইলে ইতার থিয়াত পেশাব অই যেইতই। তই আইজকাইল আগর এ্যাই ঠাট নেই। আইজকাইলর জবানার পোয়া অক্কলে আগরনান আদব-হাইদা ন শিখে। মুখর ওপর নানা ডইল্যা মন্তব্য গরি ফালাই ফট গরি। পইল্যা পইল্যা পোয়া-চাঅলরে ধঅক-তঅক দিত। কিন্তু উল্ডা দেই সয্য গরি লয়। আজার অইলেও রাচনীতি গইল্যে এরে-ওরে মাইনস্যর ঠাট্টা মশকারীঅ ওনা পরে। এদিন্যা বদিয়ালম চেয়ারম্যান হঁডে বিচারত্তুন আই হালা মিয়া মেম্বারর দোয়ানর সাম্মদি থিয়ায়। চেয়ারম্যানরে দেঈ হালা মিয়া মেম্বার মেছিয়ার অক্কলে ডাম্মরে- এই চেয়ারম্যান সঁঅরে এক্কান চেয়ার দে। চেয়ারম্যান চাদ্দোয়ানর মুখত বাআদ্দি রোডঅর ওঅর বইয়ে। আস্ট-দজ্জন মানুষ চেয়ারম্যানঅরে ঘিরি ধরি থিয়ায়। জলিল মাস্টাররে দেঈ চেয়ারম্যানে ডাহদির চেয়ারগানত বঈসত হঁয়- ওবা মাস্টার সাব বঈঅন।
জলিল মাস্টার চেয়ারগান টানি লই চেয়ারম্যানর ডান সাইডদি গরি বঈয়ে...
আজিয়া বিচার-আচার হডে আছিল্?
আন্নহইয়ন মাস্টার সাব... ওই সাতঘইরগ্যা পারার টেন্ডইল্যার বারির জাগা-জবিনের কেইচ ইয়ান লই আঁর চেয়ারম্যানি শেষ অই যেইবগই। দুনো ভাইয়র কেয়াই কেয়ারে এস্সুতা ছারি দিতে রাজি নয়। ওদা ওদা আরে ডাহি বিচারত লইজায়... আতত-পঅত ধরি ভাত হাবায়। নানান ডইল্যা পেজর হতা উইনতে উইনতে আছল হাম্মান নঅয়। তঈ আজিয়া আই হই আস্বি... এইবার বিচার ন মানিলে তারারে লাম্বা ডেকর ভাত হাবঅনর ব্যবস্থা গরইগ্যম। চেয়ারম্যান মুছকি আঁসিদি গোলদি থিয়াইয়া মাইনস্যর মুখর ইক্কা চায়।
চেয়ারম্যানঅর মুখর হতা শেষ অঈ ফরাইত ন পারে চেইমচা অক্কলে এ্যাই হতা হারি লয় হঈ ওডে- চেয়ারম্যান শা গম হতা হইয়ে। তারা দুনো ভাইঅল্লাই এলাহার মানুষ শান্তিত থাইন্ন পারের। ওদা হজ্জিয়া আর মারামারি। দেশত তারা বাআদে য্যেন আর মানুষ নেই।
বট্টইল্যা পারার গুনু মুন্সি ডাহদি আঁড়ি যাইবার সঅত চেয়ারম্যানরে ডঅর গরি সালাম দে-আচ্ছালামু আলাইকুম চেয়ারম্যান সাব। ক্যোন আছন?
গমাছি... তঈ তুই হত্তুন আইসত্যা লাগইগ্য দে... চেয়ারম্যান জাইনত চায়।
এক্কেনা পোয়ার অওরত গেইলাম দে...
কি বেয়াইরত দঅত-থঅত বেশি হাইতা লাইগ্য ফল্লায়?
গুনু মুন্সি জোয়াব দেয়- নয় চেয়ারম্যান সাব বেয়াইরে চাইত গেইলাম দে... বেশি অসুক।
অ আইচ্ছা...
গুনু মুন্সি যঅনর পর চেয়ারম্যান আবার জলিল মাস্টারর লই রাজনীতির হতা তুলে...
দেইখ্য নি ওবা তোয়ারার ধানরছরা পাআটির নেতা অক্কলে দেশ্যান ক্যেনগরি খেই ফেলার?
মাইনস্য ত হঁর উন্নয়নর জোয়ার বাঈ যারগই বলি...
ধুর ওবা আরারে বরাদ্দ নদেদ্দেই হাম উদ্দা গরিন্ন পারির। এ্যাদিন্না পেপারত নঅদেহ না... আদ্দাইন্যা বিরিজ-হালভার্ল ডঅর ডঅর ছবি উদ্দা ছাবাই দি লেইখ্যে দে তোয়ারার নেতাঅলে আজার আজার কোটি ট্যায়া হেই ফেলাইয়ে...
চেয়ারম্যান সাব ঈন অইলদে আমামিলীগর অপপচার... জলিল মাস্টরে চেয়ারম্যানর হতার প্রতিবাদ গরে।
ঠিক এ্যান ছোলাত পাশদি মতলইপ্যার দোয়ানর ভিতর হারার ভিতর মারামারি লাইগ্যে। গালাগালি এদ্দে ওজর মিলাইয়েরে এব্বেরে ঐরান-বিরান হারবা। কি অইয়েদে ওড়া ছালআমঈদদ্যা এক্কেনা চাই আয় ত... চেয়ারম্যান তার চেইমচা ছালআমঈদদ্যারে ঈক্কা দি পেড়ায়।
মুত্তর ভিতর মারামারির ভিতত্তুন হন এজ্জনে চিল্লাই ওড়ে- র্মা বদিয়ালম।
ফোয়ারে ফোয়ারে চেয়ারম্যানর মুখত অঈশ্যার আধার ভাঈ পরে। হতদিন থরি মাইনস্যর মুখত ইয়াক্কান বোল লাগি রইয়ে। হতা নেই, বাত্রা নেই; যিয়ান ইয়ানত ফাল মারি ওড়ি হয়- মারবদিয়ালম। কি এক্কান আচ্চাইয্য ব্যায়াপার। জলিল মাস্টর হতা গুরাইল্লাই চেয়ারম্যানর মুখর ইক্কা চাই হয়- চেয়ারম্যান সাব কি সিগেট হঅন ছারি দিয়ন নেকি?
চেয়ারম্যন আমাত পকেডর আদ্দি সিগেটর পেকেডত্তুন উগ্যা সিগেট বাইর গরি দে... চেয়ারম্যানর চেয়ারা দেঈ মানুজ্জন আস্তে আস্তে যাজ্জার ইক্কা আঁড়া দে। যে জন তেঈর চেইমচা আছে তারাও আমাতত বই থায়।
ওন্দি সদিয়ারব যনর পর য়েড়েঅ বদিয়ালম দেশডইল্যা মাঝে-মাঝে হতা ঈয়ান ওনে। এলাহাত্তুন যুওন আইয়ে তারাঅ হতায় বাততারায় র্মা বদিয়ালম হই ওড়ে। আইজ-হাইল বদিয়ালমত্তুন আর আগড্ডইল্যা হরাপ ন লায়। সদিয়ারবতঅ যে হজন বদিয়ালম আছে তারাত্তুনঅ হতায়ান ওনি হস্ট লায়। এতল্লায় আস্তে আস্তে বদিয়ালমর গা সআ অই যা গই। হাজার অইলেঅ দেশড্ডইল্যা অত্থয় অত্থয় ত আর ওনা ন পরের।

গ.
ইন্দি হদিন আগে অছি জিয়াউদ্দিন আতঅর মোবাইলটি পকেডত রাইখতে রাইখতে আমিরাবাজ যাইবাল্লাই নিজর রুমত্তুন দরঅজার বাইরে ঠ্যাং রাইবার ফোয়ারে ফোয়ারে অই ছই গইরত্যে গইরত্যে এজ্জাক মানুষ আইয়েরে সাম্মদি আজির। জিয়াউদ্দিন কিছু পোছার গরিবার আগদ্দি এক্কু ফোয়ারে আস্ট-দশশুয়্যা ছালাম তার হানত বাজি ওড়ে।
আচ্চালামুয়ালাইকুম সার।
ওয়ালাইকুমচ্ছালাম... কি ব্যাপারে?
ছাআডর আতা গুটাইন্যা বদিয়ালম সিদ্দার হতা হই ওড়ে......সার অনর হাচে আস্বিদে...
কিল্লাই...
কেইচ গইত্যাম...
হাল্লাই...
সিবাইর পারার পেড়াইন্যার পোয়া মুশ্বিদ্যালাই...
কি গইরগ্যে দে ইতে...
আঁই আজঅর আলী সিদ্দার পারার হালামিয়া সিদ্দারর পোয়া বদিয়ালম সিদ্দার। আর এ্যাই ছোদানির পোয়া আঁরে ডাহের দে- মার বদিয়ালম। ছোদানির পোয়ার সঅস বারি গেইয়ে... আই তারে লম্বা ডেহর ভাত হাবাইত চাই অছি সাব।
বদিয়ালম সিদ্দাররে অছি জিয়াউদ্দিনে মুখচিনা ছিনে। বিভিন্ন মাইস্যর পোয়ারে কেইচ গইত্য আর সাক্কি দিতে আইয়ে। পুরান হাইল্যা গপ মারে আর নিজর বংশ লই গওরব গরে। হতায় হতায় মাইনস্যরে টিককারি মারে। তই মার বদিয়ালম হতাআন অ অছি সাবে প্রায় ওনে। মাইনস্য কিল্লাই হয় বুজিত ন পারে। কিন্তু ভাইরাসন্নান হতাআন মাইনস্যর মুকে মুকে ছড়াই যাইতে দেহে...। এ্যাই ঘটনা লই হত যাগত মারামারি বাজে। এ্যাদিন্যা অ মুন্সুপ বাজার এ্যাহতাল্লাই এজ্জনে আরেজ্জনরে মারি মাথা ফাড়ি দিয়ে। হবর পাআ গেইয়েদে মতিরন মলইয়ে নেকি দুনুপরে বোয়াই ঘটেনান ভাঈ দিয়ে।
অছি সাবে হয়- মার বদিয়ালম হইলে কি অইয়ে... ইয়ান ত আইজ-হাইল মাইনস্যর মুকে মুকে অই গেইয়েগই।
বদিয়ালম সিদ্দারে পতিবাদ গরে- কি হঅন অনে। তে আঁরে দেইলে দুরত্তুন হে হতা হঁই কুডকুডাই আঁসে। তে অইলদে আইল্যার পোয়া। তার বাপে আরত আইল্যাহাম গইত্যে গইত্যে মাথার চাম ওড়ি গেইয়ে আইজ-হাইল তে অ আঁরে টিটকারি মারে।
কেয়া তোয়ারে টিটকারি মারিব কিল্লাই...
সইদারব যাই টেয়া দুআ অইয়ে পঅল্লায় আইজ-হাইল তে মাইনস্য রে চোগে ন দেহে। আঁই তাচ্চোগ খুলি দিয়ম। তারে আঁই লম্বা ডেহর ভাত হাবাইঅম। অনে এক্কান কেইচ লইত হন সেগেন অফিসাররে...
কেইচ গরি কি গরিবা... ইয়াত্তুবারা তারে ডাহি মানা গরি দ। মার বদিয়ালম হইলে তোয়াত্তুন অহমান লাগে।
এবার বদিয়ালমর গলা আরঅ ডর অয়... সার তারে আই বউতবার মানা গরগ্যি। হ ন হাম ন অয়। টেয়া লাইলে হঅন... আঁই কেইচ গইরগ্যম। ফোয়ারে ফোয়ারে বদিয়ালম লড়বঅর অক্কলেও মাতি ওড়ে... সার কেইচ দেয়া পরিব। তে নইলে এ সোজা অইত নঅয়।
এবার জিয়াউদ্দিনে তারারে সেগেন অবিসারের এ্যাডে পাডাইদে। যঅন সেগেন অবিসার আদ্দু রাজ্জাকর হাচে যেই আঁর হতা হঅন। তে কেইচ এন্টি গরিব।
বদিয়ালম লড়বঅর লই সেগেন অবিসারের রুমর ইক্কা গেলে জিয়াউদ্দিন এক্কেনা নিয়াশ ফেলায়। কিছুক্কনর লাই ভাবনাত ডুবি জাগই। দেশত ইন হন হারবার আইস্বে! মাইনস্যে হতায় হতায় মার বদিয়ালম, জেটা আস্টুয়ানাল্লাই দিয়ে মারামারি, জেডা পওডার দিয়েয... ইন কি হয়। হতদিন বাআদে বাআদে ভাইরাছন্নান এইসব হতা ছড়াই যায় মাইনস্যর মুকে মুকে। দেশত ইন কি আইল... পকেডত্তুন উ¹্যা সিগেট বাইর গরি ধরাই হোড্ডা স্টাড দে...।
ওনদি সেগেন অবিসারর রুমত যাই বদিয়ালম সিদ্দারে চিল্লাই ওড়ে- কেয়া কেইচ লেহিন নপারিবা। অছি সাবে তোয়ার হাছে পাডাইয়ে ইতেঈর হতা হইবাল্লাই হই। এহন অঁনে হইতা লাইগ্যনদে কেইচ লেহিন্ন পারিব। আইনত নাই...। কিল্লাই আইত ন থাহিব? আর মানআনি হইব আর অনরাত্তুন আইনর ধারা ন থাহিব... ইয়ান কি হতা? টেয়া লাইলে হঅন...
আদ্দু রাজ্জাক শান্তি মিক্যা মানুষ। বদিয়ালমর হতার যুত্তি থাইলেও আইনর মারপেজত হঅন ধারাত কেইচ লেহা পরিব বুঝিত ন পারে। বদিয়ালমর হতায় তার হান জ্বলি যার। তহন থানার রাইটাররে ডাহে আদ্দু রাজ্জাক। এ্যাই আবু বক্কর এক্কান কেইচ লেহি দ তঅ। আই ফিরি আই সিন্নিচার গইরগ্যম। আবু বক্করর ওঅর দায়িত্ব দি আদ্দু রাজ্জাক টঅলত যাইবাল্লাই বাইর অয়।
আদ্দু রাজ্জাক বাইর অঁনর ফোয়ারে ফোয়ারে বদিয়ালম এক্কান শতি নোড বাইর গরি রাইটার আবু বক্করর হাত গুজি দে। এক্কেনা ভালা গরি লেইখ্য অভাই।
আবু বক্কর অসন্তুষ্ট অই হঁয়- এশ্বটেয়া দি কি অইব। এক্কান পাশ্বটেয়ার নোড বাইর গরঅ। এশ্ব টেয়া দি ভালা গরি লেইত পেত্তাম নয়।
বদিয়ালম পিডত আত বুলাই দে... টেয়া পইশা বেশি নেই অভাই...
কেইচ এন্টি গরঅনর পর বদিয়ালম সিদ্দার বট্টল্যা আঁডত যেই মজিতার চাদ্দোয়ানত ঢুকে। পিছে পিছে তার শারিত অক্কলেও ডুকে। বদিয়ালম ছ-আত কাপ চাআর অডারদি- মাতি ওডে। ওডা মজিতা এবার চোদানির পোয়া অক্কলে লাম্বা ডেকর ভাত হাবাইবার লাইন গরি আস্যিতে।
মজিতা জাইনত্য চায়- কি গইরগ্যদে অদ্দা?
চোদানির পোয়াঅলে আঁরে দেইলেই হয়- মার বদিয়ালম। কেইচ গরি আস্যি... এবার ডাঁই চউক না...
বদিয়ালমের কেইচর হতা ওনি, আগা-মাথা কিছু ন বুঝি; মজিতার দোয়ানর মেছিয়ার রইফ্যা ডাক মারে- র্মা বদিয়ালম।
শব্দ ইবা উনি মত্তর বদিয়ালম গোস্বায় গাল ফুলাই- মেছিয়ার রইফ্যার চইদ্যগোষ্ঠী তুলি গাইল দিতে দিতে বানাইয়া চা ফেলায় দোয়ানত্তুন বাইর অ যাই...

ঘ.
ইয়ারপরর রইবাদ্দিন বেইন্যা ফজরর নোয়াজ পরি বেয়া¹ুন আতগইরগ্যা পারা ছইদালম মুন্সীর উডানত যাই গোলদি থিয়াই। গত রাতিয়া মুন্সী র বারিত ডাহাইত আস্বিল। ডাহাতি গইত্য ঘরত ডুকিবাল্লাই তিন ইঞ্চিয়া সেগুনগাছর দরজা ভাঈ ফেলাইয়ে। হোরা বারিদি দরজা ভাঙ্গিবার ফোয়ারে ফোয়ারে মুন্সীর খুইল্লা পোয়া নুরুইছালাম থান পাই গেইয়ে। তে এক্কাড মারি ভাবিরে ঘরর ছাদত উড়ি যাইতই হয়- অ ভাবি ডাহাইত আইস্বে, ছাদত ওড়অগই।
নুরুইছালামর ডাক ওনি বুরা মানুষ মুন্সী ঘুমপাতাইল্যা উড়ি ডাম্মারে হরে ওডা?
আঁই অবা নুরুইছালাম ... ডাহাইত আইস্বে দে...
নুরুছালাম ডাম্মারনর ফোয়ারে ফোয়ারে ওডানত্তুন বদিয়ালম ডাহাইত ধঅক মারে... এ্যাই ছোদানির পোয়া, চুম্মারি থাক। নইলে গুলি গরি দিয়ম।
এ্যাতক্কনে মুন্সী তারা বুরাবুরি দুনঅজন পোয়ার বউঅরে লই পাক্কাগরর ছাদত উড়েগই। আর নুরুইছালাম পন্নার গরর বইয়ের তাকত্তুন এসিডর বতলল্যোয়া বাইর গরি আতল্লই হোনা হুইন্যা গরি থিয়ায়। যেন দরজার এ্যারদ্দি গুলি গইল্যে গত ন লাগে। ওনদি মুন্সীর বউয়ে কাদিয়ে ডাম্মারে- অপুত, অ নজরুল থুই ওড়ি আয়। ঈতারা ডাহাতি গরি লইজগগ্যই। কি এক্কান চিন্তা গরি নুরুছালাম এ্যাদ্দুরে ছাদত ওড়ি বাশর সিডিআন তুলি ফেলায়। চাইরমিক্কা ডাহাতির বারি যঅনে মুন্সীরত পাক্কা ঘর বাদিলেও সিরিগিন এ্যাইজ রেজি নগরি ফেলাই রেইখ্যে। বাশর সিরিদি ছাদত উড়ানামা গরে। ডাহাইত আইঅনে ঈয়ান হাজত লাইগ্যে।
এ্যাতনে দরজা ভাঈ ঘরত ডুক্ক্যয়েআই বদিয়ালম ডাহাইতর দল। তারা ঘরত ডুহি ডাকদে- এ্যাই মুন্সীর পোয়া মুন্সী, ছাদত্তুন লামি আয়। হডে কি আছে বাইর গরি দে। নইলে গুলি মারিদির।
নুরুইছালাম ছাদত্তুন চাইরমিক্কা হাউপ্পাই চায়দে ঘরর চাইরপায়ালদি মুখবাধা আপ্পেন পরা ডাহাইত অক্কলে পাআরা দের। চাপ্পইরগ্যা ভিতর দেহা যায় তারা কেয়ার কেয়ার আতত হাড়া বন্দুক আর লাম্বা লাম্বা কিরিচ। কিন্তু নুরুইছালামর ভাবি বুদ্ধি গরি ছাদর লাইট বন্ধ গরি দঅনে তারা বেয়া¹ুনরে দেইলেঅ তারারে কেয়াই ন দেহের। উনদি মুন্সিবারিত ডাহাতির আবাজ ওনি মাইকত নেইজে ডাহাতির খবর হইদে পারার মছইদর মুয়াজ্জিনে। আধারাইতত মাইকর আবাজ ওনি আরাইল্যা-পারাইল্যা অক্কলেও সতর্ক অই যায়। তই গোলাগুলি ডরে কেউ ঘরর বাইর নঅয়। কিন্তু ডাহাইত ডাহাইত বলি চিক্কার মারা শুরু অইযাগই চাইরমিক্যাদি।
বদিয়ালম ডাহাইতে ওমকি-ধুমকি দিতে দিতে তার ফোয়াইরগ্যা অক্কলে ঘরর জিনিষপত্তরো বেয়া¹িন ছদর-বধর গরি ফেলায়। দামি জিনিষপত্তরো যা আছে ঈইন বেয়া¹িন গাট্টি-বোচ্চা বাধি লয়। আর নুরুইছালামও সুযোগর অপোয় থায়। ডাহাতি শেষ গরি বাইরই যেবার মুওত্তত বদিয়ালম ডাহাইত্যা শিরির গোরাত আই ওমকি দি যায়- এবার ছাদত উট্যচগই আয়েদ্দেবার ছাদত ওড়িবার সময় নইদ্যম। এয়েন সত নুরুইছালাম এসিডর বতল্যো এ্যারঅদি ডড্ডপাই বদিয়ালম গত নেইজে ঢালি দে।
ও বাজিরে হই বদিয়ালম দৌর মারি বাইর অইত যাই দুয়ারর চকুডল্লই বারি হাই ঘুরি পরিজায়। আতিক্কা মিক্কা সদ্দারর এ অবস্থা দেই মুওত্তর মধ্যে বেকুব অইজাগই ডাহাইত অক্কল। পইল্যাদি তারা বুজি উডিত নঅ পারে সদ্দারত্তুন কেএন অইয়ে। যহন বুজিত্যেরগে তহন তাঁরার কি গরিব ইয়ানলই দুইফাট অইযাগই। এম্মিকাদি সদ্দারর এসিড হঅন অন্যমিক্কাদি মানুষ-জনর ওঁজর। ঘরর ভিতর যারা ডুইক্যে এ্যডিয়ার ভিতর এজ্জনে মুন্সী তারারে উদ্দিশ্য গরি হয়দে- চোদানির পোয়াঅক্কেলরে গুলি গরি।
আরেজ্জনে হয়দে- গুলি হারে গরিবি, আধারর ভিতর কেয়ারে ত দেহা ন জার।
তহনঅ বদিয়ালম ডাহাইত্যা গইরগ্যাইতে গইরগ্যাইতে ফোয়াইরগ্যা অক্কলরে হয়- আঁরে বাচা, আঁরে ফেলাই ন জাইচ।
কিন্তু এ্যতনে চাইরমিক্যা মানুষ-জনর ওঁজর বারি যঅনে ডাহাইত অক্কলে হওয়া-হুই গরে তারে (বদিয়ালম) লই ত সঅরে সঅরে শরি যঅন যেইত নয়। মাথাউদ্দা চম্মুক পোরা চদ্দাররে ফেলাই তারা তারাতারি ঘরত্তুন বাইর অই যাগই। ডাহাইত অক্কলরে যাইতগই দেহি নুরুছালাম চিক্কার মারে- অঁ ভাই-বেরাদর অক্কল এজ্জনরে হাই ফেলাইয়ি, তোয়ারা ওঁজঅ।
তহনঅ বদিয়ালম ডাহাইত্যা ফোআইরগ্যা অক্কলের পিছনে পিছনে বেশিদুর যেইন্নপারে। ইনদি ডাহাইত অক্কল যঅনর ফোয়ারে ফোয়ারে আরাইল্যা-ফারাইল্যা অক্কল মুন্সীর উড়ানত ভাঈ পরে। তারা দুওরাই বদিয়ালম ডাহাইত্যারে ধরি ফেলাই। ধরঅন দেরি আছে, মাইর শুরু গইত্যে দেরি নেই।
দইঈন পারার আদ্দুল গফফারইগ্যা হয়- চোদানির পোয়া অক্কলর জালাই ঘরত থাইন্ন পারি পান অবস্থা। মারি আট্টেং ভাঈ ফেলা।
উতুর পারার টেন্ডল মজিতা হই ওডে- বইনপুতর চউক্কুন তুলি ল।
আবার কেয়াই-কেয়াই হয়- পুলিশরে হবদ্দে।
কিন্তু হনে ওনের হার হতা। ডাহাইত সদ্দাররে ধরিত পেরইগ্যেদে মাইনস্যর মাথা আট্টিক নেই। যে জিয়ান আতত পেইয়ে ঈয়ান লই মার শুরু অইগ্যেগই। ততনে এসিডর জালা-পোরার বদলে ঠ্যাংঅর আঁডু আর আঁতর ঘিরা ভাঈ যাগই বদিয়ালম। জান ভিা চাইতে চাইতে বেওউশ অই যাগই তে। উতুর পারা মন্টু মিস্ত্রি বদিয়ালম ডাহাইত্যা রে চিনিত পারে। বাঁশহালির নুন্যাচরা তার বারি।
মন্টু মিস্ত্রি তারে চিনিত্তারী হয়- ঈতে ত চোদানির পোয়া বাশখাইল্যা বদিয়ালম ডাহাইত্যা। অম্মারে মা বউত বরঅ ডাহাইত।
ফোয়ারে ফোয়ারে আস্ট-দজ্জনে হই ওডে- র্মা বদিয়ালম।
আর পারাইল্যা যোয়ান পোয়া-ছা অঁলে বেওয়ুশ ডাহাইত বদিয়ালমের ঝাপাইপরি যে যিয়ান পায় ইয়ানলই দে...

ঙ.
দুইবছর বাদে বিদেশত্তুন আইস্যে বদিয়ালম। আইঅনর পর ঘর ঘওলা অক্কলে বদিয়ালমল্লাই বউ চা শুরু গইরগ্যে। বিশেষ গরি তার বদ্দা শফিয়ালমর দায়-দায়িত্ব বারি গেইঅই। চাইরমিক্কাত্তুন আত্তিয়-সজন অক্কলে বেরাইত আইয়ে। হয়েদ্দিন ধরি ঘরন্নেইজে মেজ্জান বইস্যে। কেয়াই রাধের, আর কেয়াই হার। চুলা আজুর নজার। এদিন্যা রাতিয়া ভাত হাই গপ মাইত্যে মাইত্যে বদিয়ালমর বিয়ার হতা ওডে। তার মাইজ্যাবু চেমন হাতু হই ওডে- বঁর ঘরত আইলে ক্যান আধার আধার লাগে। গম গরি হতা হইবার ওদ্দা কেয়াই নেই। এবার আঁর ভেই বদিয়ালমল্লাই ওগ্যা বউ আনি ফেলঅ। বঁরভেই শফিয়ালমর বউঅরে ঠেশ মারি ইবাই হতাআন হয়।
হঁইলে কিইবো, শফিয়ালমর বউয়ে পাল্টা ঠেশ মারে- চইদ্য দিন্না চান্নি এদ্দে তিন ভেন রেডিও কিনি আনোগই যাই... হতা হইবাল্লাই...
তারা ননন-ভউজে খোচাখোচা গইল্লেঅ আরগুনে বিয়ার হতা ওনি খুশি অয়। বদিয়ালমর কুইল্যাবু আজেরা হাতুন ফোয়ারে ফোয়ারে ওগ্যা মেইঅফোয়া দেহাই দে। বরভেই শফিয়ালমরে হয়- অদ্দা আই ওগ্যা মেইঅপোয়া দেখ্খি। আত্তু বেশি গম লাইগ্যে... রইশ্যার বঅর হালাপুতুনির নননর ঝি। উচ্চুরিকুলর জইদার পারা বারি। চলঅ অদ্দা হালিয়া বেয়া¹ুন মিলি চাইত যাই।
শফিয়ালম এম্মিক্কাত্তুন মাথা তুলে... চাইত ত জাবি বুঝিলাম, ইয়ার আগদি তারারে হবর দেয়া ন পরিব?
মেইজ্যাবু চেমন হাতু হই ওড়ে- জাত বনশ ভালা অওয়া পরিব। অজাইত্যা-কুজাইত্যা ঘরত আনি ভিড়া বরবাদ দেয়া জেইত নয়।
শফিয়ালমর বউ অঁলা গরত্তুন মাতি ওড়ে- হত বঁর জাত পল্লায়। আবার মাইনস্যর ভিতর অজাত-কুজাত তোয়ায়। শফিয়ালমর বউ আছিনা এদ্যে তেইর ননন চেমন হাতু এজ্জন আরেজ্জনল্লই ঠেশ মারামারি গরে।
মেইজ্জাবু এদ্দে ভউজর এ ঠেশ মারামারির ভিতর আজেরা হাতু বইনঅরে হয়- ইন ন হইঅ অবু। ঈতারা বেশি গম মানুষ। ঈতারার আত্মীয়-স্বজন বে¹ুন ভালা মাইনস্যর জাত। মেইয়াপোয়া ইবার আচার ব্যবারঅ আত্তু গম লাইগ্যে।
শফিয়ালম এতক্কন চুম্মারি থাক্কিল। গুরা বইনঅর হতা উনি বউঅর মুখর ইক্কা চায়।
আজেরা হাতু এবার বদ্দারে হয়- তইলে হালিয়া ছালামতালী উকিলঅরে দি হবর পাঠন না। আজেরা হাতুর হতাল্লই আরঅ জারা আছিল বেয়া¹ুনে এম্মত হয়। তইলে হালিয়া হবর পাঠাই আঁরা পঅরুয়া যাই।
পদ্দিন বেইন্যা শফিয়ালম ছালামতালী উকিলঅরে জইদার পারা মাইয়ারঅ বারিত পাঠায়। যাইবস্যত আতঅর ভিতর পনজাইশ্যুা টেয়া গলাই দি হয়- আঁরে বিয়ালর ভিতর হবর আনি দিবা, বুইজ্যনি?
ছালামতালী বউত পুরান উকিল। মুছকি আঁসি শফিয়ালমরে হয়- চিন্তা ন গইরগ্য।
ঠিক আছে যঁ তইলে, আল্লাহ ভরসা- শফিয়ালম আঁত্তুলি বিদায় দে।
ইন্দি বদিয়ালম রাতিয়া মেইজ্যাবু চেমন হাতু এদ্দে ছোড় বইন আজেরা হাতুত্তুন বউচাইবার হতা উনি আঁসিয়েরে হয়- ঠিক আছে, চাঁ তইলে তোরা। যিয়ানদি তোরাত্তুন গম লাই ইয়ানদি হতা হ।
বইনঅক্কলে তাত্তুন হনঅ কেয়ারে গম লাই কিনা পোছার গইল্যে বদিয়ালম এক্কেনাগরি চুম্মারি থাহে। তারপর হয়- আঁই বিদেশত্তুন আস্যি, আঁর পছন্দ হড়ে থাইব।
ভেইঅর জোয়াব ওনি বঈন অক্কলে বরভেইঅরে যাইয়েরে জানাইদে বদিয়ালমর হন পছন্দ নেই।
আজুইন্যা মগরিবর পর ছালামতালী উকিল শফিয়ালমরে উড়ানত আই ডাম্মারে- শইপ্যা অদ্দা আছঅনি?
গলার আবাজ ওনি আজেরা হাতু বাইরই হয়- অনে নে ওবা। আইয়ন, ঘরত আঁই বইঅন। আঁর বদ্দা বাজারত গেইয়েদে আইজু ন আইয়ে। বইঅন এতনে আইয়ের।
ছালামতালী পোয়াঅলর পন্নার ঘরত বইয়েরে ওগ্যা পান বানাই মুখত দে। ঘরর চাইর মিক্কা চায় মনে মনে হয়- ঘরে দুয়ারে ধন-দওলতর ছড়ক মারের। বিয়াআন হনঅ ঠিম্মতঅ ওয়াইত পাইল্যে আজার-চাইরাজার টেয়া আতঅত আইব।
ছালামতালী পান চাবাইতে চাবাইতে শফিয়ালম এদ্দে বদিয়ালম দুনো ভেই হতা হইতে হইতে এক্কু ফোয়ারে ঘরত আইয়ে। উকিলঅরে দেঈ শফি পোছার গরে- কি হবর আইনল্যা?
আলাহামদুল্লিহা... হবর ভালা...
ক্যান?
মেইয়ার বঅল্লয় হতা অইয়ে... মেইয়া বিয়া দিব। পঅরুয়া নাকি কি এক্কান হাজ আছে তই ইয়ারপদ্দিন তোয়ারারে যাইত হইয়ে। পোয়ার হতা পুচার গরগিল। ওননর পর তার ডগে-মগে বুজিলামদে লন ভালা।
হারণ এ্যার মইদ্যে বউ হ ওগ্যা চাইলেঅ চাইরমিক্কা মিলাই তারা আর চাম্মে ন আগায়। এজ্জনত্তুন গম লাইলেও অন্যওনত্তুন গম ন লায়।
মঙ্গলবাদ্দিন দুইরগ্যা জুওরর নোয়াজর পর দুইয়ান রিস্বাত গরি বউ এদ্দে দুই বইনঅরে লই শফিয়ালম জঈদার পারা বউ চাই ত যায়। চাইর হাটন ছরহায়াত লই তারা যহন জঈদার পারা আদ্দুল বারিরঅ উড়ানত যাই পঅছে তহন আদ্দুল বারি নিজে আঁয় তারারে ঘরত ঢুকায়। শফিয়ালম ছালাম দি তেঈর পিছে পিছে তারঅ বডু¹রত যেই বইয়ে। পুরানকি আমলর সোপা সেডত দেঈ তাত্তুন গম লাগে। বইনঅক্কলেঅ ঘরর চাইরঅমিক্কা চউক বুলাই চায়। হানিনর ভিতর তারের কয়েড্ডইল্যা ছ ছরহাআত আনি দে। ছালামতালী উকিলঅ তারা আইবার আগে আঁয় আঁজির অইয়ে। আজুন্যা আধার অই যারগই দেঈ চেমনহাতু তারা বারবার ছটফড়ায়। ওবা কি মেইয়াওয়া দেহাইবা না? আধারত্ব গম গরি দেহাঅ নজাইব। এত দেরি ক্যা গরের...
বউতন বাঁদে মেইয়ারে আঁজাই-পরাই তারার চাম্মদি আনে। দেঈয়ের বেয়া¹ুনর গম লায়। চেমন হাতু ইয়ান-ওইয়ান পোছারঅ গরে। অনে পরালেহা হদ্দুর গইরগ্যন? রাধা-ভারা গরিজ্জানন নি?
ছোড ছোড গরি ছেনুয়ারা গরবা অক্কলর পছনর জোয়াব দে।
হতা বাততারা গম লাগনর পর বর ভউজ আছিনা বেগম হোঁওরর পেজত্তুন উ¹্যা অঁড়ি বাইর গরি ছেনুয়ারার আঁতঅত পরাই দে।
ছেনুয়ারাকে ছোড় গরি হয়- কি রাজী আছঅনা?
মুছকি আঁসি দি ছেনুয়ারা এম্মিকা অই যাগই।
হদিন বাঁদে বদিয়ালম এদ্দে তার ফোয়াইগ্যা আদ্দু লইত্যা রাতিয়া জঈদার পারা যায়। ইয়ার আগঅদি ছালামতালী উকিলঅরে হবর পাঠায়। উকিলত্তুন খবর পাই আদ্দুল বারিঅ আঁস-কুরা জোয়ারাই, পইরত্তুন মাছ তুলি, ছ-ছঅরহাত বানাই এব্বেরে বেয়া¹িন থাহে থাহে গরি রাহে...
ছালমতালী মিস্টির হাটন্নুন লই সরাসরি ঘরর ভিতর ঢুকি যাগই। নিজেই দরজা খুলি আতিনা ঘরত বৈড়খ দে। জোনাফ্ফইরগ্যা রাতিয়া ভিড়া-বারি দেই খু¹ম লাগে বদিয়ালমত্তুন। ঘর-দুয়ারঅ সুন্দর। তারা ছঁরহাত-নাস্তা হাইতে হাইতে অড়াৎ গরি জেড়াত ভাবির ফোয়ারে ছেনুয়ারা ওরনার ঘোমটা টানি ছালামদি তারার চাম্মে আইয়ে।
বদিয়ালমল্লই ভাবিয়ে হতা হইতে হইতে ছেনুয়ারা চোরাচোগে দুইএব্বার বদিয়ালমঅরে চাইলই। মোড়ামোড়া ডোঁয়া এদ্দে হতা-বাত্তারা ওনি গম লাগে। মনর ভিতর এ্যায়াড্ডইল্যা মিক্কা গরে।
হতা হইতে হইতে ভাবিয়ে ছেনুয়ারার ঘোমটাগান আস্তে গরি সরাইদে।
ছেনুয়ারা এম্মিকাঅই থাইলও বদিয়ালমে তারে চাই ফেলাই। তাত্তুন গম লাই।
দুই-এট্টুওরা হতা হই তারা যঅনর পর আদ্দু লইত্যাত্তুন পুছার গরে- ওড়া কেন দেঈলি রে?
আত্তুন খু¹ম লাইগ্যে... তুত্তুন ক্যান লেইগ্যে হ।
বদিয়ালম জোয়াব নদি মিডা মিডা আঁসে...
বদিয়ালমে মেইয়াপোয়অ চাই এ্যাইয়নর পর এগারঅ দিনবাঁদে চাঁদর মাসঅর ইসাব-নিয়াশ গরি শুক্কুরবারে উকিল-আদ্দর দিন ঠি¹রে দুনুপ মিলি। য়েই মতন বেয়াক ঠিট্টাক গরে দুনুপ। হরঅচর হনঅ ঠিট্টিগানা নেই। যিন্দি যেদুউন হরচঅর হতা য়েয়াত্তুন বারা বেশি হরচ গরে বদিয়ালমে। শফিয়ালমঅ ভেঈয়র মন খুশি গরিবাল্লাই ইসাবত্তুন বেশি টেয়া হরচ গরি বেয়া¹িন ঠি¹রে। জঈদার পাইরগ্যা বেয়া¹ুনে পায়পান গরি নাস্তা-পানি পাডায়। বিয়া যত হাচে আইয়ে দুনুঘরর শান-শওগতও তত বারে।
উকিল-আদ্দদ্দিন বিয়াইল্যা ঘর-ঘওলা এদ্দে পারাইল্যা মুরব্বি অঁলরে লই জঈদার পারা যায় শফিয়ালম। দুই-চাইজ্জন ফোয়াইরগ্যা লই বদিয়ালমঅ তারার পিছে পিছে যায়। নাস্তা পানি হেইতে হেইতে ফোয়াইরগ্যা অক্কলে বদিয়ালমর অওরঅ গোষ্ঠীর নাম গরে।
মগরিবর নোয়াজর পর জঈদার পারা মছইদদ আদ্দ পরাইবার হতা। বেয়া¹ুন পান-তৌ হেইতে হেইতে নানান গপ-সপ মারে।
এ্যানসত অঠাৎ গরি অই-চঈ শুরু অই যায়। বদিয়ালমল্লই পরিচয় অইত আঁই ছেনুয়ারার ফুওতু ভেঈ আবু কালাম হয়- অ আদ্দুলাভেঈ তো মার্ঁ বদিয়ালম।
শব্দ ইবা হানত এ্যাইয়নর ফোয়ারে ফোয়ারে বদিয়ালমর হান দুনোয়ান জলি ওড়ে। কিন্তু বদিয়ালমর চাঁতো ভেঈ আদ্দু সবুরত্তুন হতা ঈয়ান ওনি মত্তর গোস্বা ওড়ি যাগই। ঈতে গোস্বায় গরম অই যাগই।
অঁনে ঈয়ান কি হইলানদে তালতো?
আদ্দু সবুরর হতা ওনি আবু কালামও আবারঅ মশকারি গরে- নঅয় আদ্দুলাভেঈ তো ...
হতা হারি লঈ আদ্দু সবুর গলারে ডঅর গরি হয়- তোআরা বঁর ছোড় মাইনস্যর জাতেনা।
কি হইলান দে তালতো... আবু কালামে অঙরহার হাত বইট্টে বইট্টে পোছার গরে...
দুনু জনর হজ্জিয়া দেঈ বেয়া¹ুন বেকুবন্নাই চাই থাকে। আবু কালামর হতা ওনি মনে মনে গোস্বায় ফুলিলেঅ চাঁতো ভেঈঅরে ঈশারা গরে বদিয়ালম। কিন্তু ইয়ার আগে দুনুজনর মধ্যে আঁতাআঁতি লাগি যাগই। তারার আঁতাআঁতি দেঈ বউঅর বঁরো গোসটি ছোরাইতে আইয়ে... এ্যাতক্কনে এ দুইজনর তরহ-বিতরহত আঁরঅ হয়েজ্জন বাজি যাগই। দুনু পারার সদ্দার অক্কলেঅ পইল্যা হজ্জিয়া বন্ধ গইত্য ঈতারা দুনুজনরে গাইল-মন্দ গইল্যেঅ শেষদ্দি ঈতারাঅ হজ্জিয়াত বাজাই ফেলায়।
হতক্কন চুম্মারি থাই বদিয়ালম বইড়াত্তুন ওড়ি শফিয়ালমঅরে ডাম্মারে- অদ্দা চলঅ যাইগই। ঈতারঅ মেইয়া বিয়া গইত্তাম নয়। এনডইল্যা বেঈজ্জত গরিবঅদে হঈত্তেইল্যে ঈতারত নও আইসত্যাম।
গোস্বায় বদিয়ালমর চৌগত্তুন টট্টপাই পানির ফোড়া ঝরি পরে।
http://www.somewhereinblog.net/blog/dolupotra/29167538